Kei mahmah in ka belamte ka vak ding a; ka kualsak kinken ding a, chih TOUPA PATHIAN thu pawt ahi. A mang ka zong ding a, delhmangte ka pikik nawn ding a, a khe kitante uh ka tuam ding a, ka hatsak ding: a thau leh a hatte leng ka ching ding a; diktak in ka vak ding (Ezek.34:15,16).
Mihingte’n i tate ki-it mahmah a, ei kipahna sang in amau kipahna, ei deihdan sang in amau deihdan, amau haksatna sang in ei haksatna kitelzaw hi. I hih theih tawp in amau a ding a hoihpen kipenuam gige hi.
Mi khat in eisang a i tate Pathian in itzaw ahi achih ka thei den hi. Dik kasa mahmah hi.
En i tate i it zahzah leh huai sang mah in leng Pathian in a itzaw hi. En i hihthei tawp a amau adia bang hih ding, bang chi hih ding chih i ngaihtuah lai in leng i hihtheihna bukimlou (limited) mahmah a, himahleh Pathian pilna leh hihtheihna in bel phakchiam neilou hi. Abul akipan a tawp tan thei a, en i tate i theih sang mah in leng Aman theichiang zaw hi. Huaiziak in a poimoh leh a kulte uh a thei mahmah hi.
Pa aw, ka ta ka naute uh non itsak a non khotuahsak zelzel chih ka theihna un hon khamuangsak mahmah hi. Ka tate kepna uah kana bawlkhelh khaknate uah na pilna in hon makaih inla, a lungsimte uh nang lam nga thei ding in hon pisak in.
Unaute zingpha. Tuni hun zatnuam chiat.