Huchi’n Samuel in suang a la a, Mizpa leh Sen kikalah a phut a, hichi tan Toupa’n a hon panpih hi, chi’n a min ding in Ebenezer a sa hi (1 Sam.7:12)
Philistia ten Israel-te Mizpa ah a om uh chih a theih un dou ding in hong kisa uhi.
Huchiin Israel mipi’n lau in, Samuel kiang ah Pathian kiang a thumsak ding in hon ngen uhi. Samuel in a thumsak a, a thumna dawng in Pathian in vualzohna apia hi. Hiai vualzohna theihgigena ding in suang a hon phut a, Ebenezer hon chi hi. Ebenezer tuh “stone of help” (panpihna suang) chihna ahi.
Haksatna leh thil tuamtuam ziak a unau khenkhat leh lawm leh vual ten thumna neihsak ding a hon chial hun uh a om sek hi. Kei mimal ka thumna leh chihtaktak a Pathian ka ngetnate ka chiamteh sek a, hun bangtan hiam a hong pai nung chiang in ka enkik sek hi. Pathian in vualzohna hon piak muh theih ding ka mu sek a, huaite tuh i hinkhua a Pathian zahngaihna i muhtheih, “Ebenezer” thupitak a suak sek hi.
Pathian kiang a chihtaktak a thumna na neihte chiamteh inla, a khonung chiang in enkik in, Pathian in vualzohna bangzah a hon pia a? Bangchi bang dawnna himahleh Ebenezer suangphuh i muh kik ding om teitei ding a, huai in Pathian thupina hon pesak thei ding hi.
Unaute zingpha. Tuni hun zatnuam chiat