Huan, Cherubte inn sunggil zaw ah a koih a; huan, cherub-te kha a kizak a, khat kha in bang langkhat lam a va khoih a, huan, cherub khat pen kha in leng bang langkhat a khoih sam a; huai inn lai tak ah a kha uh leh a kha uh a kikoih uh (1 Kum.6:27).
Laisiangthou ah Cherub ten dinmun poimoh tak nei ahihdan uh i mu thei hi. Pathian’ siangthouna kembit a humtute ahi uhi. Amau nasep leh mohpuak Thukhun Lui a akigenna khenkhat i en ding:
- Hinna sing lampi veng ding in Eden huan suahlam pang ah koih in a om uhi (Gen.3:24).
- Biakbuk a chitna tutphah (mercy seat) tung a cherub nihte kikal ah Pathian ompihna (God’s presence) a om hi (Nam.7:89; 1 Sam.4:4; 2 Sam 6:2; 2 Kum.19:15; Sam 80:1; 99:1; Is. 37:16).
- Ezekiel mengmuhna ah Pathian tuanna kangtalai pawtu in a pang uhi (Ezek.1:26-28;10:1).
- Biakbuk a mun siangthou leh mun siangthou pen kikal a puanzak ah a limte uh tuansak in a om uhi (2 Kro.3:14).
Himahleh Khrist hong pai akipan Cherub-te panmun kibang nawnlou a bang hi. Jesu hong kipiakna ziak in lampi thak leh hing tawn a puanzak sung a luttheihna Amah pumpi tawn a bawlsak in i omta hi (Heb.10:20). Hinna sing nek theihna hamphatna piak in i omta a (Kil.22:14), Pathian ompihna tuh i nei nawnta hi (Kil.21:3). Pathian toh kilemna nei in siansak in i omta a, huchiin Pathian ompihna i tang nawnta hi (Kol.1:20-21).
Pa aw, Siangthou, Siangthou, Siangthou omsun na kiang zot theihna nei a, na laltutphah hamphatnate ka neih ziak un ka kipak mahmah uhi.
Unaute zingpha. Tuni hun zatnuam chiat