Levi te’n a gam uh leh a om nate uh a pawtsan ua, Juda gam leh Jerusalem ah a hoh uh; Jeroboam leh a tapa te’n TOUPA a dia siampu nna semlou ding in a tawpsak ua. A mun sang a ding leh keltal leh bawngnou lim a bawl ding a siampute a seh zawk ziak in. Huan, Israel nam, TOUPA Israelte Pathian lam a lungsim awn tengteng in a zui ua, TOUPA a pi leh a pute uh Pathian kiang ah kithoih ding in Jerusalem ah hoh uhi (2 Kro.11:14-16).
Biakna dik leh milim biakna kan a kibatlouhna naktak a nei hi.
- Biakna dik in hon bawltu a tawisang a, himahleh milim biakna thilsiamte a tawisang hi.
- Biakna in hon bawltu Pathian ahihdan leh eite Pathian siamsa ihihdan hon musak a, himahleh milim biakna in eite a bawltu hon hisak hi.
- Biakna dik in Pathian lim leh kibatpih in hon bawl a, himahleh milim biakna in hiai pen lehbulh in milim pen ei bang in a bawl zaw hi.
- Biakna dik tuh lungsim kihong leh Pathian thu zuih nopna akipan hong luangkhi, kisaktheihna leh angmasialna tellou akipan ahi. Himahleh milim biakna tuh lungsim khauh leh kikhak, mahni kithupisakna leh kisaktheihna akipan ahi hi.
Pa aw, ka lungsim ua milimte mu theih ding in hon panpih in. Nang sang a kou a poimoh pen a ka kikoihna uh kisaktheihna leh angmasialna lakhe thei ding in hon panpih in. Nang mah thilsiamtu leh kou na siamsa lel ka hi uh chih kithei chian a, na mai a kitahlut thei ding in pilna lungtang hon pia inla, biakna dik a nang hon be thei ding in hon ompih in.
Unaute zingpha. Tuni hun zatnuam chiat