TOUPA PATHIAN thu ka kiang ah a hongtung nawn a, Mihing tapa, Tyre heutupa kiang ah gen inla, TOUPA PATHIAN in hichi’n a chi: Na lungsim a kisathei a, Pathian ka hi a, tuipi lai a Pathian tutmun ah ka tu, na chi a: himahleh mihing lel na hia, pathian na hi kei a, pathian lungsim bang in kingaihtuah mah le chin (Ezek.28:1,2).
Mi khenkhatte’n Pathian a nawlkhin ziak uh a houchik in gen lehang hiai chih theih hi : Amau Pathian Poimoh Uh.
Gendan tuam deuh in, amau kingaihtuahna ah Pathian poimoh salou uhi. Khovel thupina tamtak a neihte uh, lalgam lianpipi ana tunkhiakte uh, amau ngaihtuahna ah amau thahatna ziak kia a nei a lamkhe zou dan in kingaihsun uhi. Amau leh amau kitungkhia a, amau kia a hithei kisa uhi. Huaiziak in Pathian poimoh kisalou uhi.
Hiai bang mite Pathian bang chi’n a thukkik a leh? Amah dou kumpi thupi taktak Pharo, Nebuchadnezzar leh a dangdangte ana kainiam in, Amah thuneihna nuai a om ahihdan uh ana theisakta hi.
En leng i hinkhua a Pathian poimoh salou a mahni kisuang i hihkhak leh kua thuneihna nuai a om ihia chih i theihna ding in Pathian in nna sem thei ahi chih mangngilh louh kisam hi.
Laisiangthou hunlai hi in tulai hitaleh Pathian naih tuntun i muhte ngai thupi in, enton in, en leng huai dan mah sawm a panla ding in i kihasuan hi.
Unaute zingpha. Tuni hun zatnuam chiat.