Huan, Balaam in Balak kiang ah, “Na halmang thillat kiang ah na ding inla, huai sung in Toupan hong mu diing hiam mulou diing, kava enkhe diing. Ka kiang a hon theihsak tapeuh, ka hon hilh diing aw“, achi hi. Huchiin tangvum ah amah kia in ava hoh a, Pathian in ana tuak hi (Nam.23:3-4)
Balaam tangthu i sim leh a lungluthuaina mahmah a om hi. Pathian zawlnei hilou, thil hoihlou hih a punna deih (2 Pet.2:15), Pathian thu awiloute zawlnei (pagan prophet) himahleh Pathian in kimuhpih in, van zat in a nei hi.
Hun khenkhat ah Balaam tuh a thugente apan Pathian thumang mahmah a bat hun a om hi: “Balak in a inn dangka leh dangka-eng a dim in hon pe sin mahleh, a bang mahmah TOUPA ka Pathian thu pel in ka hih thei kei”_ (22:18), “Bangchi’n Pathian hamsiat louh ka hamsiat dia? Bangchi in Pathian nan louh ka nang dia?” (23:8), “Toupa’n ka kam a a koih ka gen ding mah hilou ding maw?” (23:12).
Himahleh a taktak in Pathian thumang ahi kei a, Israel-te hamsiat nuam, ahihziak a Pathian in a phallouh ziak a hamsiat theilou ahi zaw hi (Deut.23:5; Jos.24:10). A thugente thudik himahleh a lungsim tawng a angaihtuahna tuh tuampi ahi hi.
Balaam tangthu in khristian tamtakte i hihna hon genkha a bang hi. Pathian’ thu nasem, sinsaktu leh nu leh pa i hihna ah thudik leh thu hoihpipi kigensek a, himahleh i lungsim tawng taktak ah Pathian deihdan sang in mahni deih dan kipi bawlzaw khasek hi.
Pa aw, hiai Balaam tangthu in ka hihna tak uh hon genkha bang kasa ua, na ngaidamna kon ngen uhi. Ka lungsim tawng ua ka ngaihtuahna uh na deihna bang ahih a, huaite mah genkhia a hinpih ka hihtheihna ding un hon panpih in.
Unaute zingpha. Tuni hun zatnuam chiat