Huan, Babulon bel hoihlou paihkhawm lel, sihal tenna mun, lamdang sak chiat leh tek khum, tengmi omlou mun a hong hi ding (Jer.51:37).
Pathian in Judate a gawtna ding in Babylon-te vanzat in ana zang mahleh midang tung a atatsiatna tengteng uh amau tung ah leng tung veve a, amau leng Pathian in a subei veve hi. Tuni a i tangteel in Babylon tung a siatna hong tung ding a genkhol hi.
Babylon lalgam khopi (capital) Babylon tuh khopi thupitak, Tigris leh Euphrates luipi tungtawn a sumsinna munpi (commercial hub) poimoh mahmah mun ahi. A kulhbaang letdan atung a sakol kangtalai taitheihna khop a lian a kibawl ahia; Babylon khopi a om Huan Kikhai (Hanging garden) tuh tanglai thillamdang sagihte (seven wonders of ancient world) lak a khat a chiamteh bat in a om hi.
Hichituk a khopi lian leh kulhbaang nei a kibawl himahleh tuni tangteel in “tengmi omlou mun ahong hi ding” achih bang in kum asang a sim kuamah ten theih louh dia suksiat leh loih in a om hi. Archaeologist ten leng 2% khawng lel atohkhiak theih ding khop ua Iraq gamkeu a munsia a hong suak hi.
Na kim leh kiangte enkim vel inla, hiai ngaihtuah mah dih. Na muh theih tengteng suksiat vek a om ding, inn khat leng muh theih a omlou ding, lampi leh lei kidohte suksiat a om vek ding, gari tai tengteng leng muh a om nawnlou ding, tua na muh theih vanzuaknate leng kihong om nawnlou ding!
Ukraine leh Russia kidouna, Israel leh Hamas buainate bang i et leh building thupi taktak, khopi kilawm taktakte galvan ziak a suksiat in a om a, mipite ten theih nawnlouhna leh tenngam nawnlouhna khopi hunkhop a om hi. Eimi lak mahmah ah leng galbuai ziak a Imphal khopi a mahni inn mahmah suksiatsak a mansuah, i ten theih nawnlouhna nei i om ua, poi i sakpih mahmah hi. Nuclear galvan zang a kidouna om taktak bang hileh gam thupipen leh changkang pente leng suakta lou in suksiat in om vek thei hi. Khovel thil a omden ding om hetlou hi.
Hinapi a bang ziak a khovel thil, mihingte mah in leng i suksiat theihte kia kibuaipih khasek ahi de aw chih mimal chiat ah kidong leng ichi hi.
Pa aw, ka hainate uh hon ngaidam in. Babylon ten sinlai lathei lou a suksiat a a om bang ua ka om louhna ding un amau apan sinlai la thei ding in hon panpih inla, kou adia bang poimoh pen ahia chih hon musak in.
Unaute zingpha. Tuni hun zatnuam chiat.