Pathian in a thil bawl khempeuh a en a, ngai in, hoih a sa mahmah, huchi’n, nitaklam a om a, zinglam leng a om, a ni gukna ah (Gen.1:31)
Pathian thil bawl khempeuh bawlzoh ahih un a hoih vek a, asia khat leng a om kei hi. Kol.1:16 in, “…van a omte, lei a omte toh, muhtheihte, muhtheihlouhte toh, laltutphahte leng, thuneihnate leng; bangkim amah siam ahi...” chi ahihman in Setan leng Pathian siam ahi chih muh theih hi. Setan ding mawngmawng, ase ding mawngmawng a bawl hilou in, Pathian in a bawlzoh tung in thilsiam dangte mah bang in hoih hi. Himahleh a deihtelna a zatkhelh ziak in a hoihlou, asia, Pathian’ melma suak hi.
Ei leng Pathian in a hoihlou a hon bawl ihi kei a, i siat a i khelh leh eimah mohna ahi zaw hi. Laisiangthou in, “mi chih amau utna a pimang leh hip a a om un, khemna a tuak uh ahi zaw hi” achi hi (Jak.1:14). Himahleh a kipahhuai mahmah bel khemna i tuah hun in Pathian in i taikhiak theihna ding lampi hon bawlsak gige a, i thuak zohlouh ding khemna leng hon tuaksak lou hi (1 Kor.10:13). Pathian in a hoih a hon bawl ihihziak in khemna i tuah hun ah leng Joseph bang in khelhna taisan ding in panla chiat ni.
Unaute zingpha. Tuni hun zatnuam chiat