Huan chiamtehna (Gakkipna – Seal) nihna aphel lai in, thil hing nihna in, “Hong pai in,” achih ka za hi. Sakol dang asan khat ahong paikhia a; huai tung a tupa kiang ah leitung a kipan lemna lakhe ding a thupiak ahi a, huchi a amau akithahtuahna ding un; amah kiang a namsau thupi piak ahita hi (Kil.6:3-4).
Pathian khut taklam a Laibuzial Gakkipna Sagih a kigak pen Gakkipna Nihna phel ahihtak in Sakol San hong pawtkhia a, a tung a tuangpa kiang ah leitung akipan lemna lakhe ding leh mite kitattuah sak di’n thupiak in a om hi. A kiang ah namsau thupi leng piak in a om hi.
Gakkipna Khatna a Sakol Kang leh a tung a Tuangpa’n Jesu Khrist’ Tanchinhoih in gamla tou zel ding ahihdan hon ensak chih i genta hi. Gakkipna Nihna a hong pawt Sakol San in kidouna leh sisan suahna hon etsak hi. Himahleh hiai kidouna tuh taksa kidouna hilou in khalam kidouna ahi zaw hi.
Sakol Kang zoh a Sakol San hong pawt ahihmah bang in Tanchinhoih in gam a alakna peuh ah sawina, khalam kidouna in zui zel ding ahihdan hon lak hi. Sawltak Paul in, “kuapeuh Khrist Jesu Pathian limsak a om tum photphot in sawina athuak sam ding uhi” ana chi hi (2 Tim.3:12). Khrist nungzuite a sahkhua zuih ziak ua sawina thuak ding uh ahihdan genna in hiai Sakol San tung a tuangpa tuh leitung akipan lemna lakhe ding leh mite kitattuah sak di’n thupiak a om chia gen in a om hi. Jesu’n, “leitung a lemna lengsak ding a hong pai hon sa kei un; lemna lengsak ding hilou in namsau lengsak ding a hong pai ka hi zaw” (Matt.10:34) achih mah bang in Jesu hong paisan pen a thu zuite leh zuiloute khalam kidousak ding ahi zaw hi.
Hiai Matt.10:34 a namsau kichi thumal leh tuni i tangteel a namsau kichi thumal tuh Greek thumal “machaira” ahia,; a kibang chet hi. Laisiangthou ah hiai thumal zat ahihchiang in sawina genna ding in kizang hi. Hiai namsau tuh Rome te’n hon bawlkhiak uh; Rome sepaihte’n a melmate uh douna a azat phattuam mahmah uh vanzat khat ahi hi. Huaiziak in hiai Sakol San tung a tupa tuh khalam galsat ding ahihna ah hiai namsau manphatak toh muh in a om hi.
Kilakna gelh hunlai kumzabi khatna a khosa a hiai laikhak sim ding dan in kingaihtuah le hang. Khristian ginomte’n aginna ziak ua gam ala ua, humpinelkaite neklupsak a om ua, mite nuihza bawlna leh vuak thuak ua, kolbut leh hentakna tuak ua, suang a den a-om in, sing-atna a attan in a om uhi. Khemna tuak ua, namsau a satlup a om in; belam vun leh kel vun silh a vakvai in om ua, gentheitak a gimthuak a sawi in a-om uhi.
Kumzabi khatna a khristiante’n a tung ua vaihawm Rome kumpite sawina ahi ding mah ahi chih a theihchetna un ginomna tamsem pe ding hi. Tuni’n leng i ginna ziak a apoimoh leh khalam melma nei ngam di khop a panlak a ginna letkip poimoh hi.
Unaute nitakpha. Mangpha leh ihmut lim chiat.