Tuipi piau a ka dinleh tuipi a kipan gamsa khat, kii sawm leh lu sagih nei, akiite tung a lallukhu sawm om chiat, alutungte a Pathian gensiatna om, hong paikhetou ka mu hi. Ka gamsa muh gialbem abang a, akhe vompi khe abang a, akam humpinelkai kam abang hi; dragon in athuneihna thupi leh alaltutphah leh athilhihtheihnate amah apia hi (Kil.13:1-2)
Setan tuh Khrist tung a vuallel ahihman in Khrist nungzuite lam hong nga in, a sepaihte tuh Khrist’ nungzui saptuam mite kidoupih ding in a sawlkhia chih Kilakna 12 ah i mu hi. Khrist’ nungzuite dou ding a Setan vanzat leh sepaihte tuh Kilakna 13 ah gamsa a gen in a om uhi.
Tuni i tangteel ah gamsa khat tuipi apan hong paikhetou i mu a, hiai gamsa tuh Setan (12:9) in thuneihna apia a (13:2,4); huchiin misiangthoute a kidoupih hi (13:7). Huaiziak in hiai gamsa tuh Setan vanzat ahi chih chiantak in i mu thei hi.
Hiai tuipi apan hong pawtkhia gamsa in bang ensak ahi dia chih gamsa hihnate akipan leh Thukhun Lui a zawlnei Daniel in ana genlawknate akipan theihtheih hi.
Hiai gamsa in lu (head) sagih leh ki (horn) sawm nei, a ki-te tung ah lallukhu (crowns) om a; Gialbem toh kibang, himahleh a khe pen vompi’ khe bang, kam ahihleh humpinelkai’ kam bang ahi chih tuni i tangteel ah i mu hi. Huaiziak in hiai gamsa tuh Gialbem, Vompi leh Humpinelkai kigawmkhawm a kibawl gamsa ahi chih i mu hi. Hiai toh kibang mah gamsa Daniel 7 ah muhtheih a, Daniel in hiai gamsate’n leitung a lalgam 4-te a ensak chih ana gen hi (Dan.7:17). Huaiziak in hiai gamsa kigente tuh gamsa taktak hilou in khovel lalgamte ahi chih i theithei hi.
Daniel laibu akipan leh khovel khangthu akipan hiai lalgam 4 kigente tuh:
- Babylon (Humpinelkai – Dan.7:4,17;2:38),
- Medo-Persia (Vompi – Dan.7:5,17;2:39;5:30),
- Greek (Gialbem – Dan.7:6;17;2:29;8:20-28)
- Rome lalgam (Chizauhuai- Dan.7:7,23;2:40) ahi chih muhtheih hi.
Huaiziak in Daniel 7 a gamsa 4-na, gamsa Chizauhuai leh Kilakna 13 a tui akipan hong pawtkhia gamsa a kibang ahia, Setan vanzat Rome lalgam genna ahi chih i theithei hi. Daniel in Babylon lalgam akipan in hon entou a John in Rome lalgam akipan a leh etkik ahihman in a gamsa gente uh hong kiviolhdan hong kilehbulh chet hi.
Daniel in Rome lalgam toh kisai ana genkholhnate (7:19-28):
- Ki sawm nei
- Ki-otsakna thu gen
- Misiangthoute toh kidou
- Hun, hunte leh hun kim khat=1+2+ ½ = Kum 3 ½ = Kha 42 sung thuneihna piak a om a om
- Huai hunsung a Van Lalgam phuhkhiak a om
Kilakna 13 a Rome lalgam hihna i muhte (13:1-10):
- Ki sawm nei
- Pathian gensia
- Misiangthoute toh kidou
- Kha 42 sung thuneihna piak a om
- Van Lalgam a om mi te hih genthei
Hiaite akipan Kilakna 13 a i muh tuipi apan hong paikhia gamsa leh Daniel 7 a gamsa 4-na, gamsa Chizauhuai kibang ahihdan leh Rome lalgam gen ahihdan haihvuallouh in muhtheih hi.
Kilakna 12 a Khrist nungzuite kidoupih dia Setan hong kuankhia i muh bang in Kilakna 13 ah Rome kumpi zang in khristiante hon dou panta chih i mu thei hi.
Unaute zingpha. Tuni hun zatnuam chiat