Huai nite chiang huai hun chiang in Israel thulimlouhnate a zong ding ua, muh ding a om kei ding; Juda thilhihkhelhte leng muh ding a om sam kei ding; omsun ding a ka koihte lah ka ngaidam sin ngal a, chih TOUPA thu pawt ahi (Jer.50:20).
Pathian in a theih ding a deihbiik teltuam (selective memory) nei ding in na gingta hia? A nei hi.
Pathian in mi a ngaihdam chiang in a khelhna uh a mangngilh hi. Huai i chiang in i thilhihte thei nawnlou taktak hilou in, bangmah hihkhelh neilou dan a hon pom a, i hihkhelhte theihgige sawmlou ahi zaw hi (Jer.31:34).
Himahleh thil khenkhat Pathian in a mangngilh louh a om hi: “Nna nasep uh leh a min ziak a itna na latsak uh, mi siangthoute nna nasepsak uh, tutan a leng na seplai uh, mangngilh di’n Pathian mitaklou ahi ngal kei ahi” (Heb.6:10). Thilhoih ihihte thei den ut in theihdet ding in teel (choose) a, himahleh a hoihlou i hihte a mangngilh ut hi.
Himahleh mihingte bel a lehzawng (opposite) in ki-om sek hi. I tung a thilhoihlou tungte, haksatnate, mi’n diklou tak a hon bawlnate ngaidam i chih hang in kitheiden kha sek hi. Huchimah bang in i mi i melmak chiang in i tung a thilhoih a hihkhakte uleng kimangngilh hithet thei zel hi.
Pathian in i muhte apat in bangte theih den a, bangte mangngilh kisin ding ihia chihte mimal ah mahni chiat kisin sawm lehang ei a ding mahmah in leng hoih ding hi. Huai ding in i kihasuan hi.
Pa aw, ka khelhnate uh theigige lou a non thaimangsak ziak in ka kipak uhi. Kou leng midangte tung ah huai bang chiing thei ding in hon panpih in. Thilsiate sang a thilhoihte a ka lungsim uh pethei ding in hon panpih in.
Unaute zingpha. Tuni hun zatnuam chiat.