Ka piankhiak ni hamse thuak in om hen, ka nu’n a hon piaksak ni vualzawl in om dah hen. Ka pa kiang a, Tapa na neita hi, chih thu hon tun a, hong kipaksakmi tak hamse thuak in om hen (Jer.20:14,15).
Vangsia kisa a kingaihsiatna (depression) ichih khalam hatzoh louh ziak leh Pathian a kingak zohlouh ziak a neih ahi diam? Khenkhat in “hi” ichi mai thei. Himahleh hiai ngaihdan a dik bukim het kei hi.
I lungkhamna, i mangbatna leh i kingaihsiatnate hun paisa a khelhna gah bang, ahihkeileh ginna i taksap ziak bang hi thei tham hi. Himahleh hiaite kia kingaihsiatna omsaktu ahi het kei hi. Pathian mizat Elijah, Jeremiah leh a tuamtuamte leng vangsia kisa in, hin leng utlou khop in ana om ngei tham uhi. Amaute khalam a ahat zohlouh ziak uh hi tuanlou hi. En i thunun theihlouh thil tamtak ziak in leng vangsia kisa in kingaihsiat theih tham hi.
Ahihleh hiai kingaihsiatna Laisiangthou tungtawn in bang chi’n pan i la thei a? I lak theihna tan om hi.
- Hiai haksatna nei na hi chih pom (admit) in; Pathian in hiai haksatna nei na hi chih hon theipih hi. Jeremiah leh Laisiangthou a i muh Pathian’ mite bang in thudik (honest) inla, thumna toh Pathian houpih inla, gen in. Tuni a i tangteel a i muh bang in chihtakna toh (honest) i ngaihtuahna tengteng Pathian kiang i tut leh Pathian in honna ngaihsak mahmah ding hi.
- Na puakgikte na mi muante kiang ah gen inla, kum in. Khristiante tuh khat leh khat puakgik kidawntuah a, kapte kahpih a, lungkete hasuan dingte ihi uhi (Gal. 6:2; Rom.12:15; 1 Thess. 5:14). I khalam unaute’n hiai thupiakte a zuih theihna ding un en i haksatna leh i lungkiatnate i theihsak ngai hi.
- Pathian panpihna ngen inla, kipahthu genkawm in. Kipak gige in chihna ahi pah kei a, na ning kitelna leh na natna teng a beipah ding chi leng i hipah kei hi. Himahleh Pathian i belh a, a panpihna i nget chiang in i lungtang leh i ngaihtuahnate Aman hon kepsak thei hi (Phil.4:7). Na gentheihna ah Pathian in hon panpih theihna ding in mun awn in.
Unaute zingpha. Tuni zatnuam chiat.