An hiloupi a bang ding a dangka pai? Niang leh taina lah hilou a bang ding a na tha uh pai? Ka thu hoihtak in ngaikhia unla, thil hoih ne un, na hinna uh thil thau in nuamsa hen (Is.55:2).
Bangziak a biakna patma a Bible class khawng kilaplou a, mi kitawm deuh sek ahi dia? Aziak tampite lak a khat hi dia gintakhuai bel Pathian’ thu lunglut di bang a kilunglut zoulou, kiduh zoulou hi peuhmah ding hi. Sam gelhtu in, “Na thute ka kam a ding in khum hina tel e! ahi, ka kam a di’n khuaizu sa’ng in a khum zaw hi” (Sam 119:103) achih bang in, Pathian’ thu khuaizu khum i sak sang in khum sazou zawle hang, buaihuai hetlou ding in gingakhuai hi.
Bang ziak a khalam an duh ding a i gilkial ngeilou hi ding in na ngaihtuah a? Khalam adia hoihlou “junk food” tam i nek luat ziak hi kha ding hi. I lungsimte khovel thilte kia’n luahdim gawp a, i lunggulh leh awlmoh pente khalam sang a khovel thilte mah hi kha zaw ahi diam chihte mahni ki-et thakthak poimoh hi.
Hiai khovel thil tuamtuam tampite’n Pathian’ thu lunggulhna sang in ngaihsak louhna hon tun utzaw sek hi. Huaiziak in amaute khalam “junk food” hi khasek uhi.
Jesu Khrist’ nungzui ihihna a manphatna theichian taktak lehang naungek nawitui duh mah bang in en leng khalam nawitui kilunggulh thei ding hi. Laisiangthou thu tuh i khalam an, i hinna ding a tui leh huih i poimoh bang a khalam hinna ding a poimoh ahi hi.
“Mihing tanghou kia in a hing kei ding a, Pathian kam a thuchin pawt in a hing zaw ding” (Matt.4:4).
Unaute zingpha. Tuni hun zatnuam chiat.