Kumpipa Uzzia a sih kum in TOUPA laltutphah sangtak tawisan a tu ka mu a, a puansilh mong tual in biakinn a dimsak vek hi (Is.6:1).
Khovel mun tuamtuam leh i kim leh kiang i et chiang in thu kipahhuai sang in buaina leh khristian-te hon nongkai sak theih thil tam zaw a bang hi. A hoih lam sang in a selam in ma sawn hatzaw a bang hi.
Hiai bang dinmun ah Pathian’ tate’n bang nna i sem dia?
Toupa’n Isai kiang ah, “Kua ka sawl dia, kou a dia kua kuan ding ahia?” achi hi (6:8). Zawlnei Isai in, “Kei hiai ah ka om, hon sawl ve” (6:9) chia a dawnna tan lel etkhak a lungkim a baihlam hi. Himahleh hiai tan lel enlou a, a ban i etzom a poimoh hi.
A bung pumpi thu om dan i et leh thu hoih leh kipahhuai lua thu ahi kei hi. Kumpi Uzzia tuh kumpi a hih tuung in kumpi hoih leh Pathian lau himahleh, a hong lohchin nung, ahun nanung lam ah kisaktheihna leh kithupisakna a neih ziak in Pathian in phak (leprosy) in a gawt hi (2 Kro.26:4,5,16-22). Amah zoh kumpi gilou, a tapa a hong lal hi. Huchiin a lalgam in hoihlam sang in siatlam a manoh zaw hi. Mi tawmchikte lel humbit a om ding uh ahihdan i mu thei hi (Is.6:11-13). Mi genhak leh helhat, a thugen ngaikhe utlou leh ngaihsak utlou mite kiang ah Isai tuh sap leh sawl in a om hi (6:9-11). Hiai sapna haksa tak leh leh uthuai hetlou subuching ding in Zawinei Isai bang in a hanthawn dia?
Tuni a i tangteel a amengmuhna (vision) thu ahi hi. Kumpi Uzzia a sita mahleh KUMPI (Pathian) thupitak a laltutphah atu amu hi. Khovel kumpite hong lal in bei zel ua, himahleh Toupa’ laltutphah bel khovel kumpite tung a thunei leh vaihawm in a om den hi (6:2-5).
Zawlnei Isai in mengmuhna a ana muh bang in kumpite Kumpi, toupate’ Toupa, khovel vaihawmte tung a Vaihawmtu, i biak Pathian, alaltutphah tung a tu i mitkha in muthei gige lehang, i lungkiat hun ah hanthawnna, i lauh hun ah hangsanna hon pe ding a, a thutakte lungkelou in i genzom ngam zel ding hi.
Tunia lungkiatna na neih leh Toupa’ laltutphah lam naih ding in kipankhe mah dih!
Bangkim tunga thunei Toupa aw, khovel kumpite tung ah vai na hawm a, “Siangthou, Siangthou, Siangthou”, chia phattaak nang kia na hi. Khovel thupinate’n na tate hon nehgawp khadek sek a, tua sang a na hihna muchian zaw ding in ka mit uh hon vaksak in. Ka muk uh khelhna akipan hon hihsiangthou sak in. Na Zawlneite bang in na thutak, hinna thu genkhia a, ahun ah bang, ahunlou ah bang pangthei zel ding in hon panpih in.
Unaute zingpha. Tuni hun zatnuam chiat.