Jakobte lak a thutheihsak tuh a hihkip a, Israelte lak ah dan a sep a, huaite tuh i pipute kiang ah thupiak in a pia a, amau huai thu tuh a tate u kiang a a theihsak ding un: Khangthak hong om ding naupang hong piang dingte’n, a theihtheihna ding uh, huaite tuh a thou ua, a thou ua, a tate uh kiang a a hilh sawn zel ding un: A lametna uh Pathian a akoih theih ua, Pathian thilhihte a mangngilh louhna ding ua, a thupiakte a zon zawkna ding un (Sam 78:5-7).
Khenkhat nu leh pate, pi leh pute akipan thutak a na thei a, khristian ana hi i om hi. Tuabang khristian-te hampha tungtuan ahihna uh tampi om hi. Hamphat huai ahih kawmkawm in khenkhat ten hiai hamphatna pen naupang chik a kipan thutak i zakte suut a, theichian a, conviction hoihtak nei a khristian hihna in kizang khollou hi. Nu leh pate sahkhua leh ginna zui maimai dan a khristian hih baihlam mahmah ding a bang hi. Hiai bang a khristian i hihkhak leh i hamphatna zangkhial i hi ding a, theihna lam ah tasam in manthat a baihlam ding hi.
Khenkhat leuleu lah nu leh pa khristian ana hi khalou, first generation khristian leng i om hi. Adeihhuai pen pi leh pute akipan khristian hoihtak ana hih touh ngitnget himahleh, first generation khristian hihna a hoihna leng om veve hi. Ei mahmah in thutak i zak pen enchian a, suut a, diksa a khristian ihihna ah hamphat huai hi. Hiai thutak i theihchian pen i tate kiang a hoihtak a i sinsak kei leh i tate khang ah nungtolh in, khristian hihna bei hithet thei zel hi.
Manipur ah Khrist’ Saptuam hong lut nung tulel in khang nihna bang ah ki-omta chih theih a, tulel a khangte khalam dinmun in maban khang thumna hun a Khrist Saptuam dinmun ding hon lak thei hi. Huaiziak in tulel a khang nihna a om ten, i nu leh pate ginna, kipiakzohna, ki-ittuahna leh theihna i phazou na hiam chihte ki-enthak a, i tate khang a Khrist Saptuam dinmun ding ei a kinga ahi chih thei a, kuhkal tak a pang ding in i kihasuan hi. I tate’n i ginnate hon zuilou a, ginna hon pialsan ding uh lauhhuai mahmah hi.
Unaute zingpha. Tuni hun zatnuam chiat.