Huchi’n Boazi in Ruthi a pi a, a zi a hong hita a; huan a kithuahpih a, Toupa’n nau a paisak a, huan, tapa a nei a. Huan, numei in Naomi kiang ah, tuni mahmah a tanau nai sam lou a a hon omsak TOUPA phat in om hen la; Israelte lak ah a min hong thang hen. Huan, amah pen na hinna tungdingpa leh na teklam a hon vak a hong hi ding a; na mounu nang hon itnu, tapa sagihte sa’ng a nang a dia hoih in amah lah a suangta ngal a, a chi ua. Huan, Naomi in nau a la a, a pom a, a donta. Huan, a innvengte’n numei a min a saksak ua, Naomi a ding in tapa a hong piang a, chi’n a min ding in Obed a sa uh; amah bel, David’ pa Jesai’ pa ahi (Ruth 4:13-17).
Ruth tangthu i sim a, Jesu i muh bat kei leh a tuptak man khalou ihi chihna ahi. Boaz in Khrist a ensak a, ama leiba hi hetlou mohpuakna la in dinkhia a, tankhetu ding neiloute a ding in tankhetu in a pang hi (cf.Lev.25:25-55). Ruth in leng Khrist a ensak kha hi. A inn leh inkuante nusia in a tekpi (mother-in-law) a enkol a, a nna a sem hi. Khrist in leng a van inn nuam nusia in ei nna hong sepsak a (Ruth in a etsak), i leiba hon ditsak in hon tangkhetu in a hong pang hi (Boaz in a etsak).
Rahab’ tapa, Boaz leh Moab numei, Ruth akipan Obed hong piang a, aman David’ pa, Jesse hon suang hi. Huchiin David khanggui apan Jesu Khrist hong piang hi.
Pa aw, khovel et a simmohhuai pente tungtawn a thil thupitak na hih zel ziak in hampha ka kisa uhi. Ka khelhna ua kipan hon tankhetu ding a na Tapa non sawl ziak in kipahthu kon gen uhi.
Unaute Toupa’ zingpha. Tuni kikhop nuam chiat