Toupa’n Mosi kiang ah, “Tu in Levite kei aa ahih ding uh ahi. Aigupta-te’ tapa upapente ka thah lai in Israel inkuante’ tapa upapente leh ganta chih a piang masate kei a din ka septuamta hi. Tun ah, Israel-te’ tapa piang masapente sik in, Levite ka nei zota a, kei aa ahih ding uh ahi. Kei tuh Toupa ka hi,” achi hi (Nam.3:11-13)
Nambar 3 ah Mosi in Levi namte hon simna ah Levi’ tapa thumte Gerson, Kohath leh Merari khanggui in hon khen a, a khanggui dungzui un a tenna ding uleh a mohpuakna tuamtuam dingte uh hon gen hi (Nam.3:16ff, cf.Exo.6:16f). Siampu nam hi vek mahle uh thillat leh siampu nna pen Aron leh tapate sep ding ahihdan hon gen hi (Nam. 3:5-10,38-39).
Pathian in Aigupta gam a tapa upapen that a Israel-te suahtakna a piakni akipan Israel-te lak ah piang masa pen amah a ding in a hihsiangthou hi. Himahleh tuni a i tangteel a imuh bang in piang masapente sik in Levite amah nna sem ding in teltuam hi.
Levite hinkhua tuh amau aa hi nawnlou in Pathian in a leisa ahita uhi. Huchimah bang in Thukhunthak ah khristian-te leng Pathian’ siampute, man a leisa ihita uhi (1 Kor.6:19,20). Levi namte Amah a ding mawngmawng a ahihtuam bang in (Nam.8:14), khristian-te leng Pathian in khovel dan bang a omlou a adeihdan a kilamdang zaw ding in hon deih hi (Rom.12:1,2). I pumpi hiangte khelhna vanzat hilou in diktatna vanzat a pephal zaw ding in hon deih hi (Rom.6:13).
Unaute zingpha. Tuni hun zatnuam chiat