Himahleh, unaute aw, na lak ua semgim leh, Toupa a na heutu ua om leh, nou hon hilhte thei ding in k’on ngen ahi; A nna sep ziak ua itna ngai thupi mahmah di’n. Kituak in om un (1 Thess.5:12-13)
Zan nitak nisim Jan.17, 2024 in Kolkata a Preachers’ Meet a hoh preacher teng unp.Kaithiamson-te nupa nitakan nekpih ding in hon chial uhi. Kikhopna hun ka neihna uah a lawinu unn.Manlunching in Pathian’ nasem mi hiai zahtak (mi 16, intekpa tellou in) a inn ua hoh ding chih a ngaihtuah chiang in hampha kisa in, kipak mahmah ahihdan hon gen hi. Amah denomination a khanglian ahihna ah denomination te’n Pathian’ nasem a aneih uh Pastor-te, Evangelist leh a dangdangte leh Khrist’ Saptuam thutak a hon muh nung a saptuam mite’n Pathian’ nasemte a i neih thu nasemte i muhdan leh koihdan a kibatlouhdan amah mimal muhdan hon kum in, hasotna thu hon gen hi.
Unaunu’n hon genna ah denomination ten Pathian nasemte a ngaihsang dan uleh zahna a piakdan tuk un Khrist’ Saptuam ah Pathian’ nasemte ngaihsanna omlou bang mahleh aman hon ngaisang mahmah ahihdan hon gen hi. Huai kia hilou in, Preacher-te mahmah leng dinmun niamtak a kikoih mah bang hon sak hun om chi hi. Loh tampi nei in om kei mahle uchin khalam a dinmun poimoh tak nei na hihdan uh kithei, denomination saptuam makaite sang a dinmun niamzaw hilou na hi uh; amau sang mah mite Pathian’ thutak hilh a pitu na hihna uah na dinmun kiniamkoih hetlou a na om uh poimoh mahmah ahi, hon chi hi. Amah ngei leng Pathian’ nasem khat toh a kiten midang sum leh pai tampi loh toh a kiten sang a hampha kisa zaw ahihdan hon gen hi. Unaunu thugen te’n thu nasemte tha hon pe mahmah hi.
Thu nasemte hon ngaisang mahmah ahihdan leh a inn ua ka va hoh uh kipak ahihdan etsakna in sum leh towel neu hoihtak khat honna pe chiat hi. Nna hoih sep inn akipan (charity begins at home) ahi chi in apasal ah hon pan in thilpiak ka vek un hon pia hi.
Tuni i tangteel in Pathian’ nasemte a nasep ziak ua ngai thupi mahmah ding in khristiante hon thuhilh hi. Semtute mahmah leng i nasep dinmun kitheihchian poimah mahmah ngut hi. Saptuam ten i dinmun leh mohpuakna chiat toh Pathian’ saptuam lamtou thei ding in Pathian in hon vualzawl hen.
Unaute zingpha. Tuni hun zatnuam chiat