Journalism school a asinsak uh story khat bawlkhiakna dia dotna 5 dawnna a telsak teitei ding uh chih om hi. Huaite tuh kua (who), bang (what) bangchik in (when), koimun ah (where), bangziak in (why) chihte ahi uhi. Hiai dotnate dawng le chin, news (thuthak) ngaitute theihnop poimoh teng telkha teitei ding hi.
Khovel a laibu kigelhkhia om teng lak ah Genesis laibu kipat dan sang a kipatna bukimzaw omlou hi. Gen.1:1 in, “A tuung in Pathian in lei leh van a siam” chiin pan hi. Hiai tuh Journalism a kisim, dotna poimohte dawnna thumal 500 hiam, article pek 5 val zen a kigelh hilou in, mawl chik leh theihnuam tak a thuvual (sentence) khat lel a kigelh kim ahi hi.
• Kua? Pathian
• Bang? asiam (created)
• Bang chik in? A tuung in
• Koimun ah? Lei leh van
Himahleh dotna khat kidawng khalou hi. Bangziak? Bang ziak a Pathian in lei leh van siam ahia? Genesis bung khat pumpi i simsuak leh thu poimoh bangzah hiam i theihtheih om hi: Pathian in khovel pumpi (universe) bawl a, huai ah hinna (life) a hong om theihna ding in thil tuamtuam a bawl hi. Hinna tuh sing leh lou (plants) ah muh masak in om a, huchiin ganhingte tuinuai leh leitung a-te muh in hong om hi. Himahleh thilsiam thupi pen tuh tang 26-27 muh in om hi: “Huan, Pathian in, i kibatpih in, ei mahmah bang in, mi i bawl dia, amau tuipi a ngasate tung ah, tung a leng vasate tung ah, gan tung ah, leitung tengteng tung ah thu i neisak ding, a chi a. Huchi’n, Pathian in amah kibatpih in mi a siam a, Pathian kibatpih mahmah in ahi a siam; pasal leh numei a siamta hi” (Gen.1:26,27).
Bang ziak a Pathian in a thilsiamte tengteng bawl masa ahi dia? Mihingte a hon siam theihna ding ahi. Ei mihingte a hon bawlkhiak ut ziak in i khosak theihna ding in thilsiam dangte ana poimoh masa hi. Thilsiamte thiltup pen tuh ei mihingte ihi hi. Hoihtak in ngaihtuah vengveng mah dih.
Himahleh, bang ziak in (why) chih toh kisai a i dot theih hiai kia ahi kei hi. Bang ziak a Pathian in ei hon bawl ahi dia? A dawnna tuh tang 26 ah chiang mahmah hi – Amah melpu a Amah toh kibat ding chih ahi hi. Hiai ah thuuktak a ngaihtuah ding a om hi. Bang agenna ahi dia Khenkhat ngaihdan ah, Pathian in Amah kithuahpih theih ding, Amah toh kizom ding, Amah batpih deih ahi achi uhi. Hiai kithuahna (fellowship) leh kizopna ganhingte toh om thei mawklou hi.
Midang khenkhat ngaihdan ah, thil lim (image) in a lim neitu (image bearer) hihna lah a a etsak (represent) bang in ei mihing ten leng khovel ah Pathian hihna i lah a etsak poimoh ahi achi uhi. Thuuk tak in hiai ngaihtuah sin mah dih. Pathian’ sianthouna, diktatna, zahngaihna, hehpihna leh a ihihna tuamtuamte khovel ah i lah ngai hi. “Kei ka siangthou ngal a, huaiziak in nou leng na siangthou ding uh ahi” (Lev.11:45).
Ahihleh hiai ngaihdan nihte koi a dik zaw dia? I thei kei, himahleh anih tuak in thil hithei leh tulai in leng ei a ding in poimoh hi. Nang leh ken Pathian toh kinaitak a kizopna i neih a; khovel ah Amah mel a hoihlam a lakkhiak ding mohpuakna i nei hi.
Hiaite i hinkhua ah zat sawm ni.
Unaute zingpha. Tuni hun zatnuam chiat