Jesu hong pianna Laisiangthou ah kimu mah leh a ni kigenlou a, a pianni leng Laisisngthou in Khristmas ahi chilou hi. Khristmas kichi thumal “Cristes Maesse” (“Mass of Christ”) apan kilakhia, AD 1038 a hong kizang pan ahi. December 25 Jesu pianni a lop ding toh kisai Liberius, Rome khua Bishop in 354 AD a thupiak ana bawl pat ahia; Laisiangthou akipan ahi kei hi.
Jesu leitung ah kum 33 1/2 vel hong khosa a, a pianni a lopna leh lop ding a athupiakna khat leng Laisiangthou ah kimulou hi. Anungzuite kiang ah Thutak Kha a hong tun chiang in, thutak tengteng ah nou ahon pi ding (John 16:13) na chi a; kum 70 sung phial bang Khasiangthou pina toh nungzui ten Pathian a biakna uleh a nna a sepna uh Laisiangthou ah imu. Himahleh hiai hunsung in leng Jesu pianna a lopna uh, Khristmas a chihna uh muh ding khat leng om lou hi. Sawltak Paul in koumau hiam aw, van a kipan a hongsuk angel nangawn hiam in leng, tanchin hoih na kiang ua ka gensa pen louh ngal uh tanchin hoih dang himhim honna hilhta a om uh leh, hamseloh in om hen (Gal.1:8) na chi a, Peter in mi’n thu a gen leh Pathian’ thu bang in gen hen (1 Pet.4:11) na chih behlap hi. Khasiangthou in thutak tengteng a api Sawltakte tanchinhoih gente lak a Khristmas chu tel khalou ahi peuhmah.
Huaiziak in Khristmas na lop leh Catholic saptuam in hon patkhiak Protestant saptuam ten hon zuih uh zuipih na hi lel a; Pathian thupiak zui na hi kei.
Khristmas lop louh ding i chih in Laisiangthou a Jesu hong pianna thu i sim kei ding a, theih leng i sawm kei ding chihna hilou.
Jesu hong pianna thu Matthai leh Luka ten gelh tuaktuak ua, himahleh a gelhna uh i sim leh Jesu hong pianna toh kisai a hun tuamtuam a thil tungte gelh uhi. Huaiziak in khenkhat in thei kokalh uhi. Huaiziak in Jesu hong pianna toh kisai a thil tung a kizom dan in i en ding.
- Jesu pianna – Matt.1:25; Lk.2:1-7
- Belampute vehna (a pianni nitak) – Lk.2:8-20
- Jesu zeksumna (ni giat a upa ahih in) – Lk.2:21
- Jesu temple a siansakna (pian zoh ni 40 zoh a kibawl zel – Lev.12:2-6) – Lk.2:22-38
- Mipilte vehna – Matt.2:1-12
- Egypt a taina – Matt.2:13-15
- Pasal naupangte thahna – Matt.2:16-18
- Nazareth a kiknawnna – Lk. 2:39; Matt.2:19-23
Jesu pianna thu na sim chiang in hiai a kizom dan ngaihtuah in sim le chin na theisiam ding hi. Tamtak ten suahlam mipilte toh belampute a kibang in a ngaihtuah uhi. Mi kibang ahi kei uhi. Belampu ten a pianni nitak mahmah in vo veh ua, himahleh mipilte bel suahlam akipan hong pai ahi ua, temple a sinsuahna, Mosi’ dan dungzui a ni 40 zoh a kibawl zel pen zohma a tung kei uhi. Mipil ten Jesu insung ah a mu ua (Matt.2:11); himahleh belampu ten bel gan anpiakna kuang ah puan a tuam ahihlai in amu uhi (Lk.2:12,16). Mipilte mi bangzah ahi ua Laisiangthou in hon hilh kei a, a thilpiak ubel thum ahi chih i mu hi. A thilpiak uh thum ahihziak in amau mi thum ahi uh chihna hilou hi. Laisiangthou in mipilte chi ahihman in khat sang a tamzaw bel ahi peuhmah uhi.
Unaute zingpha. Tuni hun zatnuam chiat